close
平時係屋企，我同海晴瞓，爹哋瞓隔離房，有時爹哋話要一齊瞓，海晴都話唔好，叫爹哋走
今次去旅行，都係海晴瞓先，我地整理哂野先瞓，所以佢地一齊瞓既情景係好少出現呢
我成晚瞓得唔好，海晴郁黎郁去，跟住個冷氣搞到我鼻好乾
俾佢瞓到九點幾，快快步走去食早餐，因為話好似至到十點
餐廳係沙灘隔離，可能係第一曰啦，同埋香港呢排成曰陰天又凍，見到藍天興白雲，真係心情都開心哂
啲早餐一般都冇影響心情
食飽飽返去執野 check out
呢棵芒果樹好多果實，如果熟就好喇
陽光普照真好，影d相都靚d
準備check－out
其實之前食完早餐，十點幾就有人自動自覺黎幫手拎行李，我仲執緊，叫佢半個鐘頭後再過黎
放低鎖匙就走得，幫我地拎行李果位阿哥問我地去邊，我地俾個名佢，佢就話係附近，但我地拎住行李唔方便，佢肯兜一兜我地過去，真好
唔駛5分鐘就到左BAAN HAAD NGAM
爹哋check－in先，海晴就叫我幫佢影相
因為果陣都係11：00，未有咁快有房，前台阿哥帶我地去olivio飲杯野等入房，佢話要一個鐘喎
見到間餐廳既景咁靚，更係有心機等
佢話跟房每人有一杯free drink
餐廳行幾級樓梯就落到沙灘，因為呢段時間水涱，變左一落去係海水
杯野飲差唔多飲哂，海晴又坐唔定，爹哋就帶佢睇海同洗腳
都等左成個鐘，跟住爹哋再去催睇下有房未，其間海晴話有＜唔唔＞，一坐廁所板又話冇，進進出出6次，終於有去到
爹哋返黎話仲要等到半個鐘，海晴再玩多陣水，已經唔耐煩話要入房
最終13：15我同海晴再去追問，個男仔一句就話仲未得，叫我等，我話可唔可以快d，我個囡好眼瞓
跟住佢打個電話，竟然話有房，我地梗拿淋淋上房啦
然後再問我海晴生日蛋糕想第二日上午定夜晚送到，仲有係邊切，我話要再覆佢
嘩，一上到房，爹哋話好靚呀好靚呀。。。。。泳池個view好正，仲有滿哂水既jazzcui
因為我book resort時話係我地4週年結婚紀念同埋係海晴生日，佢地係張床佈置左一對天鵝同埋好多花瓣，但因呢d花瓣吸引左好多烏蠅
兩父女急不及待要浸浴，浸左陣，我地出去食野
我地行去路口，搭排車，要200bht＝hk＄51.5，快到丫，3分鐘就到，crazy
呢間prego係o係Amari呢間酒店對面，食意大利菜
一開始就有碟包放低俾我地享用
食過乜野，下一篇PERGO詳細介紹
成間餐廳得5－6張枱，可能果陣太晏掛，不過枱枱都係外國人
可能好少類似海晴咁大既小朋友啦
我冇幫佢著片，佢一餐飯都話要去五，六次殊殊
行過總會被人撩佢，用英文問佢幾大同叫咩名，佢話＜鄧海晴，two＞
之後返埋位仲戴帽同埋眼鏡，即刻擰向人地果邊show time咁，個鬼婆都戴帽和應下佢
臨尾走仲走向人地果邊同人講＜bye bye 姨姨＞，仲飛埋吻，搞到人地好開心
回程搭番的士走200bht＝hk＄51.5
返到去都16：00，係茶几見到有支有氣酒，兩隻香檳杯，一盤水果
爹哋游左一陣水，影下相
佢就出去做spa，我同海晴就瞓晏覺
海晴差唔多五點先瞓，我都瞓左陣
爹哋做完spa返到黎都七點，佢話要2000bht＝hk＄515，好貴，早知唔做，又唔係特別舒服，係沖涼個環璄正，係個石洞沖涼
我地怕太晏食飯，去左reception問車，呢間都係一曰四班，但時間好古怪10／11／16／17：00
問佢地開車出查汶要幾多錢，佢地話200bht＝hk＄51.5，跟住我地再俾間泰菜名佢，佢話果度遠d要300bht＝hk＄77
果然真係幾遠，車程我估有15分鐘
去到門口見到以為去錯，因為成間酒店門口咁，有reception counter （但冇人），入到大堂就有好多飾品櫃
經過條樓梯同走廊，出到去黑麻麻，好似入左森林，再一直行就見到餐廳，又係黑麻麻，蠋光晚餐
其實入到去已聽到奏樂，雖然我地唔係坐近海灘，但都見到個黑色既海，聽住海浪聲食飯
枱枱都係鬼佬鬼婆，可能呢間餐廳有d名啦，連侍應d英文都好流利
佢仲好nice，會話俾我地聽唔好叫咁多野食，會好飽的
食過乜詳細見下篇poppies
我只叫左個炒麵同fruit punch （兒童餐牌）俾海晴先，驚佢肚餓，搞搞下都20：00即香港21：00呀，其餘等爹哋話事
可能係兒童餐關係，味道真係好淡，好彩海晴都肯食
食食下仲有人出黎跳泰式舞，海晴不停話＜點解咁既？＞佢又冇驚喎，仲一路食一路睇表演
明明坐低時望住個海係冇月亮，食到中途再望海，叫到海上面有個橙色又圓又大既月亮，爹哋話可能呢個先係真月亮。到我地食完飯，我見到個月亮升高左同埋變番黃色，覺得好神奇呀
呢餐食得好滿足，環境又好
食飽飯，爹哋去唱錢先，其實我妹同爹哋同事用淨加埋都有八千幾bht，佢地係對3.88，呢間對得低，得3.82
之後我地行下附近，呢邊屬於查汶南面，相對比較靜d
畫得真靚，俾海晴吸收下d藝術氣氛
呢間酒店都幾靚，好有澳門feel
行行下發現有夜市，裏面都幾旺，好多衫呀，飾物，擺設賣，仲有食肆同酒吧檔添
我仲買左佢話係天然材料做既梘，一舊120bht = HK$31，話買五舊就平均100bht＝hk＄25.7
另外買左舊放梘既椰殼碟，記得好似係港幣10，但係返到香港碎哂了
海晴開始行d唔耐煩了，爹哋去7－11買水同買牙膏，我地就係出面等爹哋
係7－11門口見到有pancake檔，叫爹哋買黎食下，因為個個去過蘇梅都話呢個係必食
爹哋就一路買一路哦我，話我咁夠薑食街邊野，又話唔可以俾海晴食
我話唔怕啦，要有事齊齊有事啦，咁多人買
我地買左朱古力香蕉味，話普通朱古力醬係40bht＝hk＄10.3，若用nutella就50bht = hk＄12.8，我都驚架，梗係食熟悉既牌子啦
見佢都幾易整，先係鍋到落漿，熟左就放新鮮香蕉片，跟住接到四方形，再落牛油反轉煎脆佢，然後上碟落朱古力醬，練奶，再切到細細塊，食得
我地截左排車200bht＝hk＄51.5，係車上即食pancake，果然好好味，因為海晴唔食香蕉，所以佢冇爭食，good
返到房再同海晴沖涼，開奶佢瞓，23：00前瞓左
全站熱搜
留言列表
西式甜品 (0)
