close


---- 21M 早餐前去完公廁殊，食完後問佢有冇，已跑到去，發現底褲濕左，襪褲少濕，掉左底褲仔，究竟係滲定賴尿，幾時屙呢？

---- 21M1D 一早俾爹爹搞到佢忟喊，華田之後問佢做乜一早起身喊？佢答「wher~wher~wher~爹爹搞」

----- 姨姨送上聖誕禮物，兩大隻米奇米妮，開心到佢暈，發現佢姨佢婆同佢玩，可以唔駛搵我，正（好百厭，係梳化跳落地都唔驚）

---- 21M2D 買左年票梗要密密去，十點幾出門口食早餐，上火車都12：00，跟住去金鐘轉巴士又塞車，其實都冇乜時間玩，諗住去睇熊貓，又話瞓哂，結果坐纜車過對面，嘥下時間睇下野不停去廁所，轉眼3：10，去海洋劇場vip位，未夠鐘聽現場音樂不停喊，係後尾海豚海獅出去先冇事，仲手指指

----- 之後睇到一半多啲又話屙殊，返到黎完場又唔捨得走，俾支奶佢食等佢瞓，冇幾耐又話屙殊，又要搵廁所，已跑到去，除褲就發現佢忍唔到，賴左，原來我手都濕左。我都知唔關佢事，下次我應熟讀廁所係邊

----- 21M3D 媽媽，希望唔會惹到海晴啦。今朝去食早餐，先放低佢坐，我仲未坐好，佢已舉手叫「唔該麵麵魚蛋」，侍應擰轉身都聽到佢話魚蛋，問佢係咪即是魚蛋麵？佢答係，仲笑得好開心

----- 21M4D 已經三星期冇上pg，同佢講話華田同佢上堂，媽媽出面等好冇？佢答好。上堂前早左三個字，佢都肯玩玩具，我就去食早餐，慢慢食完聽佢喊住搵媽媽，我即出去，原來係佢最冇耐性既故事時間，佢同華田攞餅，華田唔俾，應該miss 又話唔可以等等，佢開始喊到收唔到聲

---- 我同佢走，反正我病都唔想入課室，等佢靜落黎問佢點解喊？佢答「姨姨鬧..海晴食餅餅... Wherwherwher..流鼻水」之後再問佢，多左句「華田俾」，但成日講姨姨鬧，係度學事非。（晏晝有個袋難開，開唔到，佢突然叫左句，原來學米奇講「工具精靈」，笑屎我）

----- 21M5D 今晚爹爹公司食飯，佢上半場因拍掌歡呼聲狂喊，不斷廁所埋位出酒樓門口三邊走，後尾因為有野食、有汽水飲，同姐姐熟左、爹爹出場表演，之後拍掌歡呼已唔驚，仲可拍埋一份同跳舞，不過諗番之前佢地一歡呼，佢嚇到跳起加爆喊，超搞笑

---- 而家有記憶，每次之後都會講番發生乜事，例如剛才「海晴怕怕。喊。wherwherwher。姨姨俾波波」

---- 21M6D 今朝好眼瞓唔想郁，叫華田推車仔帶海晴出去買早餐，佢竟然肯仲同我講拜拜，問車車係邊。返黎禁鐘，我落去抱海晴返上樓，讚佢叻買早餐俾媽媽食，跟住我刷牙，佢仲催我「媽媽，海晴買mum mum，媽媽食」（而家成日攝左肉入牙，跟住話「痴牙，牙籤」，佢就自己撩，有時都會撩到）

---- 而家好叻咋嬌投訴，佢又中意入房玩，華田入房看住佢兼同佢玩，應該同佢話peekaboo ，佢初初玩到哇哇叫，跟住不斷叫「華田走」，華田冇走，佢跑出黎鄒眉同我講「媽媽，華田走呀」，想我幫口叫華田走

---- 呢期最愛睇米奇妙妙屋，兩手放係口邊大叫「精靈」，跟住我收埋佢奶咀，佢搵，我叫佢講「媽媽精靈」，跟住佢講完塞左奶咀俾佢，佢哈哈笑左好耐，肯定覺得唔係真勁搞笑

---- 21M1W 發覺佢真幾掛住佢爺爺，同佢嫲傾電話實要搵爺爺，又肯俾佢爺拖住行街，同嫲爺影相自動埃過去佢爺度影（本身晏晝可賣甩佢係爺嫲家，爹爹唔放心，硬要我上樓接返佢，結果佢不停有提子提子乾食，根本唔願跟我走）

---- 21M1W1D 琴日我大叫爹爹名，今日問佢爹爹叫乜名，佢就話「鄧希」（今日佢瞓到十點）

---- 今朝佢係藥房兩個門口走來走去，激到我攬實佢唔放佢落地，佢喊得超肉緊，放佢落地細細聲wher，唔忿氣。到坐小巴，再同佢傾話唔可以走來走去，好曳，佢都冇乜反應，跟住我再講，若走左去，媽媽華田見佢唔到，我地返屋企，海晴自己係街，以後見唔到媽媽爹爹婆婆爺爺嫲嫲，佢開始好淒慘咁喊。我再話以後唔可咁樣走左去知唔知，佢喊住話知，我要攬實佢同佢講，而家媽媽係度攬住你，你唔好再曳唔好再喊，佢就收哂聲，到落車帶佢去玩滑梯，佢而唔記得，仲擒欄杆上到好高。

---- 早兩日出街食飯，表演用手指行落，仲自跟住向上行講「up」，向下行講「down」，佢唔知幾時開始學識運用了

---- 21M1W2D 今日過荃灣買野，順去新開場playroom玩，又幾大同多野玩，問佢肚唔肚餓，佢點頭，問佢咁我地去食野，走唔玩，佢話唔好，再問佢係咪有得玩唔洗食，佢答我係。（最嬲今日影既相，好多係黑色，死機[怒]）

---- 頭先佢食飽發脾氣，我叫咁你走，佢答我好，即sir落地向門口走，我話我嬲，佢入左房一陣再走出黎，我話我嬲唔睬你，佢扁咀嗌「wati，媽媽嬲」，華田教佢say sorry，佢行埋黎扁扁咀望住我講sorry，我話好啦，唔嬲，唔好再發脾氣，佢話知即笑哂，扮同我講第二樣

---- 21M1W3D 今朝去街市買餸，途中又扭要走，叫姐姐俾車厘佢食，佢食完又話「one more」，跟住姐姐話最後架喇，冇架喇，跟住佢答要「two」，仲樹起兩隻手指。

---- 會向姐姐求救講「help me」（今日真好曳，成日發脾氣，仲想擒完櫈再擒上枱，鬧佢就話「我走」）

---- 21M1W4D 今日晏覺瞓得一個鐘，之後去行街，行一陣就扭要走，發脾氣仲瞓街，抱起佢打佢pat pat兩下，曳到死，之後不斷同佢罰話。之後再去爺嫲家，食野飲野好乖，到食飽又扭要走，跟住再發脾氣，個個都話佢脾氣臭

---- 沖涼時同佢訓話，問佢唔準再係街瞓地，唔準再發脾氣，知唔知。佢背住我玩緊水答我「知知知」，跟住我繼續話佢咁做唔啱，咁樣唔乖，咁樣冇人中意.....跟住我見玩潑水玩得好開心，我問佢，你有冇聽我講野？佢答我「冇」[哼][怒]

---- 21M1W5D 今朝叫極佢都唔醒，爹爹又話唔好剿醒佢，結果瞓到十點，跟住唔肯瞓晏覺，到五點先瞓，跟住俾佢婆哦我好咁先俾佢瞓。我都夾係中間，一個要佢瞓，另一個又唔俾佢瞓。

---- 21M1W6D 我沖完涼出黎，爹爹話海晴38.3度。跟住又幫佢除外套熄暖爐，即刻降溫。飲完奶後瞓左陣，因鼻塞用口抖氣，跟住嘔，嘔左兩舊大痰，23：30瞓至3：00，已醒左5次，嘈下扭下發下惡夢咁，之後38.1度，因唔飲水俾支奶佢食，跟37.7度。係口講野「wati呢？爹爹呢？熄燈，咕，換片，媽媽殊」，跟住眼仔碌碌一陣又瞓番。

---- 21M2W 今朝七點幾醒，發現佢38.5，同佢食退燒藥，一個鐘內退了，之後11個鐘都冇燒，到第12個鐘又燒到38.5，爹爹話有一下39，但除紐即降溫，再食多次退燒藥退了，係成日咬口、鼻水開始流出唔係倒流，兼時時刻刻話食奶奶

---- 今年聖誕節可以係家過，豐豐富富食一餐，好開心，係唯一海晴病倒了，慶幸佢精神好同埋食慾好，兼佢搶住食藥水，未夠鐘都話要食，俾佢食，佢竟嗌「好耶」

---- 21M2W1D 今日帶佢睇醫生，話佢喉嚨少少紅，病毒感染，要繼續閉關，萬幸係佢冇發燒了。可能鼻塞，覺得佢食飯食奶冇咁好胃口，其他腸仔火腿燒賣朱古力搶住食。

---- 我去左廁所，聽到電話响，係isaac媽媽打黎，打返去，佢話海晴接電話，問佢媽媽呢？佢答「係廁所」，再問爸爸呢？跟住聽唔到海晴答乜喎，我再問番爹爹係咪佢教海晴答，佢話冇。

---- 21M2W2D 今日去唔到大派對，可惜。之後睇左哈利，佢都幾中意睇。跟住爺嫲同我地去許願樹附近食野，好好味，之後再去左行左去許願樹行下，出去走走都好開心

---- 剛才臨入房瞓前，不停喊，因為佢知自己有痰係喉嚨，佢一喊就作嘔，再叫佢吐出，吐左兩次好多了

---- 21M2W3D 今日帶佢出尖沙咀食晏，不停話迪士尼，結果再帶佢去海港城影胡迪。係火車見到哥哥姐姐食包，又話要食，搞到人地婆婆俾件排包佢食，個婆婆話海晴高大同埋識講好多野，到人地婆婆合埋眼瞓，佢仲想食包，竟叫「婆婆，包包」，好瘀。

---- 怕左佢，一落車見到美心，即同佢講話去買包，佢話「我要入」，一入到去即衝去同姐姐講「我要食cake cake」，問佢幾多歲，佢答「兩歲」，俾左包佢話俾錢，佢遞俾姐姐叫「姐姐」（平時明明叫呢啲係姨姨）

---- 21M2W4D 今日把聲沙哂，老牛聲，好搞笑。脾氣又大，係街市食野扭去第二度，伸左我一腳，我忍唔住隨手攞銀包打佢大脾一下。（可能冇見佢婆幾日，聽到開門都叫婆婆，一見到面即低頭，唔理佢婆）

---- 21M2W5D 華田話佢瘦左，爹爹話佢面凹左，佢係食少左奶，但其他野照食，我又覺得佢差不多，只係而家笑容唔同左樣咁，係牙齒關係？[疑问]

---- 唔知係咪果煲湯勁，咳少左痰少左，但仍然有咳，今日唔識吐痰，若果吐得出好快好，把聲仲未回覆。鼻涕係滲出黎果種應收尾，但又係唔識呻，所以咁耐都未完全好

---- 21M2W6D 一早瞓醒已話「Isaac come , b do come 」，佢真好中意佢地，仲係有幾聲咳同痰，少左好多，賣菜介紹煲海底椰天山雪蓮湯，同埋食猴棗未，希望可連少少痰咳都清埋。

---- 21M3W 新既一年，希望全家身體健康，唔好病。但今日節目就係睇醫生，見佢仲咳，原來變了氣管炎，氣管收窄了，變左容易咳，醫生叫唔好係戶口，吸入冷空氣，同埋唔好劇烈運動。見到醫生即扮可憐指住口「咬呀，食藥藥」，醫生摸佢肚問佢痛唔痛，佢答「冇痛」e，勁[爱你]

---- 佢自己排藥跟住講「藥藥排隊」，然後數數，又話「wati戴mask」，問佢戴mask做乜，佢話「出去」，再問佢今日邊個戴左mask？佢答「媽媽爹爹海晴」。佢講返今日去睇醫生情景。

---- 經過見到米奇波波，即同我講「買」，我話你問爹爹，佢爹爹俾左銀包佢，佢楂住行去買，但一路行一路望住銀包，我問佢你楂住果個係咩黎？佢答「銀包」，我問佢銀包愛黎做乜？佢答「俾錢..買」

---- 開始慢慢想唱歌，同埋a-z可以自己講到8成，每次y and z完，佢就話「now I ...... ABC.........me」

---- 21M3W1D 好奄悶，乜都要媽媽，又成日話要去街，真係煩都煩屎。晏晝唔俾佢飲奶，喊左陣，睇電視瞓著了

---- 而家問佢xx係邊度，佢就答「there」，搵華田幫手就講「help me」

---- 今日俾兩本簿佢揀，佢真係識揀一本，另一本話唔要。（晏晝食野時明明華田坐對面，佢都話「媽媽，wati呢？係邊」，跟住我問佢海晴呢？係邊？佢即刻笑，唔答我）

---- 21M3W4D 今日瞓到十點先起身，但其實五點幾食奶、七點幾食奶，十點又食，好彩撲了6罐奶粉。仲有今日太凍，8度，冇返學了，佢自己玩唔駛要我陪

---- 21M3W5D 今日又冇出街，佢煩到嘔，隔兩三個鐘就叫食奶奶，痴左線。而家有六罐奶存貨，唔駛怕[耶]

---- 21M3W6D 今日同佢婆姨食buffet，係車時候話係去迪士尼，同佢講食buffet都話唔去，但一到，未坐低就話要出去攞野食，好high，仲話「yeah yeah yeah」，跌到四腳朝天都唔喊。有個經理同佢講野佢唔怕，抱佢坐低都冇扭偈[赞]間中仲有咳，晚上朝早會多啲，冇乜痰，咳果然係長手尾

---- 21M4W 燉果皮橙好勁，冇乜咳了。今日爺爺俾[钱]海晴買衫，可以買好多衫了[偷笑]，不過我應用來去旅行。

---- 其本上而家同佢對話真一問一答，問佢要食乜，佢就答「食魚蛋麵麵／通粉／包包」，叫佢吹下野食先好食，佢就答「冇熱，凍」，問佢同邊個食buffet，佢答「媽媽／婆婆／姨姨／舅父／爹爹」，咁buffet有乜食？佢答「蕃茄／麵麵／包包／cake cake／ icecream」

---- 華田第二天幫海晴沖涼，琴日唔多願俾佢沖，今日都肯了，但一定要我係廁所等佢幫佢著衫，仲好快起身撲去我度。

---- 21M4W1D 今日俾佢對話笑屎，我同佢係電腦睇片，播緊迪士尼主題曲，佢一齊唱「飛起飛起」，跟住靜左再睇，無端好似發現新大陸咁講「come on come on」，應該佢平時聽得呢個字多，跟住好驚訝人地都講呢個字，發現佢都幾留心聽，跟住仲叫華田「wati..see...慢慢行」，即叫華田過黎睇下

---- 夜晚話要帶dog dog去爺嫲度，我話唔得呀，到時又唔記得拎走，佢放低，跟住話帶Mickey ,佢拎左mickey俾我，我問佢你俾我做乜？佢答我「袋住」[哼]（而家唱abc，最尾兩句都幾準，同佢一齊唱，佢話「媽媽唔好」，唔俾我一齊唱

---- 又爆片，估唔到咁多殊。半夜咳得好利害，係痕果隻，唔通氣管仲未好？而家食左支奶就停左咳，不過九點又登記睇醫生，免得變肺炎／哮喘。而家又話要睇mickey，由佢睇到眼攰。

---- 21M4W2D 已睇醫生，醫生話冇細菌感染，係氣管敏感，間唔中一兩聲唔洗食藥，易番發，冷空氣同污濁空氣，又會咳過，若天氣凍開暖氣有幫助，假若一個月返發兩次，有抗敏感藥，抑制番發

---- 有日佢婆生日，佢一見到佢婆講「生日」，跟住話要切蛋糕。到食飯無端端攝隻手去佢婆頸背講「冇凍」，佢都可以伸到手摸自己頸背

---- 有日等小巴等左好耐，佢無端端望後面話「姐姐食麵麵..好肚餓...排隊」，個姐姐果然排緊隊食麵麵。（晏晝帶佢去買胡迪翠詩筆，佢好中意楂到實，又對住支筆講野同笑）





頭圍 ??CM

體重 25 LBS （屋企磅）
  
身高 82 CM

上身長 ?? CM

下身長 ?? CM

手長 ?? CM

腰圍 ?? CM

手板 ?? CM

腳板 ?? CM

大脾 ?? CM


arrow
arrow
    全站熱搜
    創作者介紹
    創作者 小歌 的頭像
    小歌

    小歌的部落格

    小歌 發表在 痞客邦 留言(0) 人氣()

    E-mail轉寄