小歌的部落格

Jayla is Day 4

今日瞓得奇差

原本隔離床走左，我覺得夜晚好恐怖，合埋眼半個鐘都未瞓到，到瞓著

1:00 有姐姐黎隔離SET床，因為有人入房，然後幫佢教一輪，我又未可即時瞓到

4:00 慣性起身

6:25 好谷尿一定要起身去，否則覺得有D痛，咁就成個人醒哂，去到產後第一次大便，舒服哂。刷牙洗臉執野起身，準備餵奶

7:30 去餵奶，仲帶定出院衫仔俾姑娘，等海晴可以出院的話，就先幫佢換左衫仔。見停左餵幾次奶，今日試下埋身餵，海晴又俾人吉針抽血，不過我見到海晴時，佢就好精神，咁我都冇咁心痛

8:25 開始唧奶，應該都有15-20ml，拎左過去育嬰房

9:30 偷聽到隔離打電話俾屋企人，第二胎，由入院凌晨十二點幾，至bb出世都係點幾鐘，真快。跟住我去隙佢傾偈，話佢知可以租餵奶袍，每日有咩做，探病時幾點呀..... 佢都幾好傾，睇佢個樣完全唔覺佢啱啱生完b，好精神

10:05 有個姐姐黎做清潔，剛好隔離兒科醫生去同隔離媽媽報告bb狀況，知道媽媽家姐係呢度做護士，然後姐姐同我講：你地好啱喎，你老公之前又係度做，我話：你又知既? 佢話佢個陣成日要去化驗室所以就成日見，我話仲以為佢周圍隙女仔，佢話冇咁即事，係佢地隙我老公咋喎

10:10 劉醫生到，佢話海晴黃疸冇超標，可以跟我返屋企喇，不過話佢左手脾有紅點，應係打卡界苗關係，但應冇咁快有反應住，可能係有小小發炎，叫我每日用火酒幫佢抺，問題不大。另外話bb呼吸大聲係正常，因為鼻孔小所以係會大聲d，只要冇發燒食到奶就ok，佢提我帶佢多d哂太陽，去附近健康院做檢查

10:25 打左去王少清約時間做檢查，約左明早十點半，帶打針咭、出院文件、父母身份證，因可能要成個鐘，要帶奶粉、尿片

10:45 曾祥風黎睇我傷口，話冇問題可以出院，唔好食進補既食物，咩生化湯去瘀湯等，話有人曾經飲完，流血量多左再要入院

11:00 老公同奶奶黎到，將行李分批搬落車，再等仁安計哂數通知找數先可接BB

11:30 仲未收到通知，老公打去催，隔左一陣就打入黎叫去reception俾錢，問老公幾錢唔肯講

12:00 我去辨出院手續攞藥，跟住過隔離接育嬰房接BB，入到房姑娘同我對番BB的資料，仲叫我攞找數單俾佢睇，最終老公俾左我，我見到要HK$66,000仲要95折左，真係要儲番D錢喇，估緊急開刀費用多左兩萬蚊，個姑娘同我講香港人唔貴，大陸人BASIC未計麻醉費BB巡房費都要五萬幾，如住平民既私家房起碼要十萬

13:30 終於帶海晴返到屋企喇，我地食飯盒

開始崩潰既生涯了

奶奶晏晝走了，返去煮焗雞飯同煲木瓜湯

到傍晚奶奶同老爺黎左送飯，奶奶幫海晴沖涼，個頭大家準備沖涼野，老爺話唔好嘈醒海晴沖涼，好陰公，但個頭就自己係床仔抱起海晴往廳行，又轉彎轉得快俾奶奶話，總之我覺得好鬼煩啦....... 已整個晏晝都冇瞓，又話我同唔識湊，要請陪月同工人，煩爆

因為夜晚得我同老公湊，老公半夜聽到阿囡呼吸聲好大聲，好驚，成晚將盞床頭燈又開又熄十幾廿次，我叫佢完全唔好熄架啦.....

後尾發現海晴俾兩粒鼻屎卡住鼻孔，我地梗唔夠膽"了"啦，老公話明天一早要帶去俾兒科醫生睇，已經趕唔切10:30去健康院

成晚我地兩個都冇乜瞓，我估自己整日都有幾個鐘瞓，希就完全冇瞓

返屋企第一日