小歌的部落格

係View Mount Hotel 餐廳食過西式Buffer 早餐，我地就楂車上去黑岳登山纜車(http://www.rinyu.co.jp/kurodake/index.html) 上去黑岳五合目，我地會搭纜車上山，來回纜車費用1,850YEN/人，等左一陣就可以上纜車了，當初心裏有點怕，好彩有工作人員陪住。

上到五合目站距離地面有海拔1300m，就係咁高了(紅圈係我地前一晚住的地方)。

黑岳是大雪山國立公園其中最高的一座山，如上到山頂九合目是海拔1984m，首先由五合目上去七合目是可以坐雙人纜車，即是冇蓋而腳又可以露出來，但我地去呢段期間關閉，所以我地只好觀望。我知道在冬天，遊覽者可以在七合目滑雪同登山

講回我感受了，上到山冬天的積雪仍未退，我地竟然仲可以見到雪，初時以為好凍，所有衫著上身，結果反而在太陽底下覺得好溫暖，而家個天好藍好靚 (2)

我地行了幾層樓梯上到觀賞台，360度環觀周圍既山景，感到很宏偉，心亦有種坦然感覺，很舒服

隨後我地去到附近的「銀河之滝」和「流星之滝」，原想影幾張相 (2)走，希隨口說影瀑布是應從對面山頂影，點知真的發現對面有路是可以行上山頂，對從未行過山的我，430m確係吃力，初步梯級似樓梯都好好行，越行越大級，行左大半個鐘上到山頂再影相 (呢張傻瓜機影，兩個瀑布攝於同一張相內)，中途都有日本人行上去，我諗佢地當做運動，上去快落番黎都快。

我地行番落山，途中我有一級太高想落唔落之間，動作勁白痴，希係後面睇笑左我好耐，而家仲好記得。好快我地又肚餓，落左山下食野，只有齋烏冬、蕎麥面，都唔平HK3x-4x/碗，但都好味

我地開車由雙瀑台往北見方向駛，GPS告知要四個半鐘頭到，首先經過一條很長的隧道，估計有5000m，好黑好恐怖，我全程合埋雙眼。

出到路面，沿路天朗氣晴，大約駛了一個鐘多，我地到道之駅食午餐，點了蕎麥麵、咖喱豬扒飯、日式燒汁魚餅。呢個道之駅都算幾大，有食店有商店，有好多遊客都會停一停抖一抖，希仲見到佢的Dream Motor。

起程行駛，上山落山，山路係<髮夾灣>，我記得有路係山頂，前行如果唔轉彎會跌落山涯，好恐怖。我地目的地去川湯旅館check-in，到第二天才去東藻琴芝櫻公園，我都知會經過，係車見到都想即刻去，但當時四點人又好多，距離旅館仲有大半小時，唯有繼續行駛

在去旅館途中，我好專心望前面看下幾時會到啦，突然希一路駛一路望住我呢邊叫 ：『哇~ 哇~ 哇~』我問佢及轉向左邊看：『你哇乜鬼?都冇野睇』希說：『頭先有隻好大既鹿，成架車咁大，好驚呀!』到我望返前面時見到：『哇~ 有狐狸仔呀，係前面，你快D睇下!』好彩我隨身拿住DC，立即同狐狸影相

終於16:35到旅館(設施詳細見溫泉浪漫之宿湯之閣篇)，比GPS預計早了一小時到，即時層雲峽往川湯要三個半小時。我地放低行李，訂好私人風呂，再到附近拍照。

日本水仙花芯好大

這個市鎮都沒有人上街，面對風呂的街開了一連串的雕刻舖，我好懷疑究竟有沒有人買

我地返去食晚飯，這餐是這幾天最清淡的，可能我是訂最平的關係啦，大少初時有少少怨言。食飽等浸溫泉時，我拿了電腦在大堂上網，我還和Icarus視像傾偈，有點似印印同家鄉朋友傾偈