小歌的部落格

琴晚刷完牙即瞓，係五點幾起左身一陣，好快就瞓番到鬧鐘响(7:00)

7:30 去餵奶，今日BB眼光光，望住我餵奶，姑娘話BB吸啜人奶係要好用力，好攰，所以會餵餵下瞓左覺，我仲未有奶出，補奶粉60ml，每次幫佢掃風就眼仔碌碌，好精神

今次我自己幫佢換片片，又屙臭臭，但一D都唔臭，原來係自己BB既就唔怕幫佢會尿片，有D啡黃有一粒粒白點，原來係正常既.....

9:00 兒科醫生報告BB所有野一切正常，臍帶血驗的報告冇問題，暫時未見到面黃

10:00 曾醫生黎睇我傷口，話我復原都幾快，字宮收縮得唔錯，明天轉防水膠布先可以淋浴，剛好我睇緊bb相，醫生望d相話似我多d。醫生走左之後，姑娘見到我收腹帶歪左幫我整好又話惡露好少唔好用墊底紙，因好焗。仲問我係咪mix，我話姑娘你先似呀，姑娘話佢真係mix，我答我唔係喎

10:30 呢餐原來係bb最好瞓既一餐，個個bb掛住瞓唔肯飲奶，海晴俾人摷醒係咁喊，餵餵下又瞓，跟住要姑娘搞掂佢

12:00 我媽到左，帶左節瓜瘦肉湯同梅菜肉餅飯，我飲住D湯先

12:30 MEIKO到左，仲送我地一盤靚靚花籃，真係好靚呢.....

跟住我同佢地去睇BB，後尾有個大陸婆帶埋成班FD去睇佢BB，佢個B都未出黎，個大陸婆左攝右攝，最終攝左係我前面，當正我個囡係佢個囡咁......

13:00 奶奶同老公終於到，帶左木瓜雪耳豬肉湯同粟米焗雞飯，我食左呢個飯先

14:30 又到餵奶時間，海晴好肚餓啦，食唔到媽媽奶係咁喊，我快快用奶粉餵飽佢先，一食到奶粉就好乖係咁望住我食，唔知認得到我未呢?

15:30 菁菁到左，帶左雞精我飲，無幾耐個陪月到左，因為我突然轉左開刀，老公驚我復原得慢，就請個人返黎照顧我同BB，個陪月員真口水多過茶(我想瞓下架嘛)，返二至日，每天6小時，負責買餸煮中午同夜晚個餐我食、幫BB沖涼、洗BB衫、烚奶樽。佢原本話下星期一上去我屋企視察下，睇下有咩缺，講講下話買埋餸上去，即正式開工啦，咁駛乜視察下呀??? 我星期一出院，無理由吉出間屋俾佢無險雞龍嘛...... 喂，我第一日識你架咋，我點會放心你一個人係我屋企出出入入呀.....開始懷疑佢個腦，算，都係一個月，有咩野唔啱即叮

17:00 不知不覺又到親子時間

正式第一張合照

笑得好開心呢......

18:30 老公走左喇，我又去餵BB，姑娘都同我講笑話返工咁....... BB又係好忟憎，見到佢咁，我好心軟冇堅持，餵飽佢食奶粉先，我發覺自己奶吱損左，姑娘話係想損，後尾幫我係咁唧，好痛，但俾佢唧到D奶奶出黎，我就用奶奶搽番個傷口，希望等陣個一餐餵到啦...... 仲有，今日佢食完奶既尿片，全部都係我自己換架